ILOILO CITY – Nagapanguna ang Barangay Bo. Obrero sa Lapuz sa pinakadamo nga health protocol violators nga gina-monitor sang La Paz Police Station.
Sa interview sang Bombo Radyo kay Police Major Edfel Balibadlan, station commander sang La Paz Police Station, iya ginpahayag nga kalabanan sa mga salawayon amo ang wala nagasuksok sang face mask.
May yara man sang nagasuksok apang indi husto ang pagbutang sa nawong.
Santo sa Marso 14-20 nga data sang pulis para sa bug-os nga distrito sang La Paz kag Lapuz, 221 na ang nasawayan bangud wala sang face mask, 423 ang wala naga-face shield kag 337 ang wala nagaobserbar sa physical distancing.
Nagasunod sa Bo. Obrero sa may pinakamataas nga numero sang health protocol violators amo ang Barangay Caingin, Barangay Baldoza, Barangay Lapuz Norte, Barangay Lapuz Sur, kag porsyon sang Barangay Ticud.
Ginpahayag ni Balibadlan nga kun indi gid nila madala sa saway ang mga tawo, nagaisyu sila sang ticket para sa monetary penalty.
Suno naman kay Punong Barangay Ricardo Diño, Jr., iya ginpahayag nga nagapaninguha man ang mga barangay officials nga mapahanumdom gid sa mga pumuluyo nga sundon ang health protocols.
May gindeliver man nga mga face masks sa barangay nga mahimo ihatag kun makit-an nga may mga pumuluyo nga wala nagasuksok sang face mask.
Nagaapelar gid ang punong barangay sa publiko agud indi na magtaas pa ang kaso sang COVID-19.
