ILOILO CITY – Wala sang basehan ang profiling ukon pag-background check sa mga communit pantry organizers.
Ini ang suno kay Atty. Jonnie Dabuco, director sang Commission on Human Rights Region VI, kasunod sang kontrobersyal nga pahayag kag pag-ako ni Lieutenant General Antonio Parlade, spokesperson sang National Task Force to End Local Communist Armed Conflict (NTF-ELCAC), nga gin-profile nila ang mga organizers sang community pantries sa pungsod.
Sa interview sang Bombo Radyo kay Dabuco, iya ginpahayag nga risgo ini sa rights to privacy sang isa ka tawo ilabi na kun maayo man ang intensyon sang pagtukod sang community pantry.
Una diri, ginbuyagyag sang Maginhawa Community Pantry organizer nga si Ana Patricia Non nga napilitan siya nga isuspinde anay ang operasyon sang pantry sa Quezon City bangud sang safety concerns kasunod sang ginapahayag pagpang-redtag sang Quezon City Police District kag sang NTF-ELCAC.
Suno naman kay Dabuco, indi ini husto bangud ang community pantries gani amo ang nangin paagi sang mga Pinoy sa lain-lain nga lugar sa pungsod nga ipakita ang pagbinuligay sa tion sang mapin-ot nga pangabuhi dala sang pandemya.
