Liwat nga nag-file sang diplomatic protest ang Department of Foreign Affairs (DFA) batok sa China bangud sa “unilateral” imposition sini sang fishing ban nga nagsakop pati sa West Philippine Sea.
Suno sa statement sang DFA, ginpalawig sang China ang annual fishing moratorium pati sa dagat nga lapaw na sa ila nga teritoryo.
Ang fishing ban sang amo nga pungsod ang epektibo halin Mayo 1 tubtob Agusto 16 kag maga-cover sang tubig nga “north of 12 degrees north latitude” sa disputed nga dagat, nga suno naman sa DFA, ini nga dagat sakop na sang sovereignty, sovereign rights, kag jurisdiction sang Pilipinas.
Ginapanindugan sang DFA nga ang fishing ban sang China ang nagahilabot na sa kahilwayan kag teritoryo sang Pilipinas.
Nahibaluan nga sa sulod na sang tatlo ka bulan, madamo na sang na-file nga diplomatic protest ang DFA bangud sang presensya sang Chinese militia vessels sa West Philippine Sea. #
