Nagsaka na sa 28 ang active cases sang COVID-19 sa Barangay Nabitasan La Paz, Iloilo City humalin Mayo 4.
Sa interview sang Bombo Radyo kay Punong Barangay Barbara Joy ‘Barbie’ Aroza, iya ginpahayag nga nag-ugat ang paglatnanay sa COVID-19 sa ila lugar sang nagpositibo ang isa ka empleyado kag nagaistar sa isa ka compound.
Suno kay Aroza, bangud sa asud-asud nga contact tracing kag pagpaidalom sa Reverse Transcription Polymerase Chain Reaction (RT-PCR) test sa mga close contact, nadugangan pa ang numero sang mga COVID-19 positive sa ila lugar.
Kapaslawan sa pagsunod sa minimum health protocols naman ang ginalantaw ni Aroza nga rason sang pagtimbuok sang COVID cases.
Bangud sini, nagapangabay naman ang punong barangay sa iya pumuluyo nga indi magkakapoy sa pagsunod sa mga pagsulundan agud malikawan nga malatnan sang amo nga virus.
Samtang, nagapasalamat naman si Aroza nga sa pihak sang ila sitwasyon, nagapadayon ang pagpabakuna sang pila niya ka pumuluyo batok sa COVID-19 sa diin siya mismo ang mapatublok na subong nga adlaw sang iya ikaduha nga dose gamit ang Sinovac nga brand.
Indi man pabor ang opisyal sa ginaduso nga proposal nga indi na pag-ipahibalo ang brand sang COVID-19 vaccine nga itublok sa mga pumuluyo sang syudad.
Ini bangud suno kay Aroza, kinamatarong sa gihapon sang iya pumuluyo ukon isa ka indibidwal nga makaangkon sang ihibalo may kaangtanan sa kun ano nga sahi kag kun sa diin ginmanufacture ang bakuna nga itublok sa iya.
