ILOILO CITY – Lapta-lapta ang ginapulian nga mga lugar sang mga COVID-19 positive nga mga indibidwal sa Barangay Calumpang, Molo, Iloilo City.
Ini ang rason suno kay Punong Barangay Roberto Niño Jr. kun ngaa indi pa maanunsyo kag matul-id subong kun sa diin gid nga bahin sang barangay ang ipaidalom sa surgical lockdown.
Sa interview sang Bombo Radyo kay Niño, iya ginpahayag nga i-assess na lang kun sa diin nga sitio ukon zona ang may pinakadamo nga kaso kag amo sini ang irekomendar sang Molo medical health officer nga patumanan sang surgical lockdown.
36 ang COVID-19 cases nga narekord sa Calumpang halin sang Mayo 1 tubtob 24, isa ang napatay, kag 20 tubtob 23 ang nagapabilin nga active cases.
Una na nga ginpahayag ni Niño nga kalabanan sa kaso amo ang local transmission — naglatnanay ang mga pasyente sa sulod sang balay kag ulubrahan.
Ginahulat na lang subong ang executive order ni Mayor Jerry Treñas para sa istrikto nga surgical lockdown kag kun diin ini ipatuman.
Sa bahin sang pagpaninguha sang barangay officials, bangud daku nga barangay ang Calumpang, gina-cluster ang mga lugar suno kay Niño kun sa diin may Barangay Health Emergency Response Teams (BHERTs) kag contact tracing team sa kada sitio para sa mas mahapos nga monitoring sa mga pasyente kag sa ila naka-close contact. #
