Apat ka nagapanguna nga butang ang indi sarang mapauntat bisan naka-modified enhanced community quarantine (MECQ) man ukon naka-general community quarantine (GCQ) ang isa ka lugar.
Ini amo ang transportasyon, trabaho, religious gatherings, kag kinahanglanon sa merkado.
Ini ang ginpahayag ni Iloilo Governor Arthur Defensor, Jr. may kaangtanan sa iya gin-isyu nga executive order sang nagligad nga semana nga nagapatuman sang mga minimum public health standards sa byahe, merkado, workplace, kag mga simbahan samtang naka-modified GCQ ang probinsya sang Iloilo.
Suno kay Defensor, nagpangayo siya sang bulig sa PNP kag LTO agud nga mabantayan ang mga nagasakay sa pampubliko nga transportasyon.
Sa mga merkado, ginapatuman ang clustering sa nagapaninda kag wala sang scheduled market day.
Sa religious gatherings, 30% lang sang seating ukon venue capacity ang sarang maakupar sang mga sumilimba.
Sa workplace, kinahanglan nga ginapatuman sang maayo kag istrikto ang tanan nga minimum public health standards agud malikawan ang transmission.
Una diri, gin-athag sang gobernador nga amo na sini ang direksyon sang probinsya kag wala siya sang plano nga pasakaon sa MECQ ang probinsya.
