ILOILO CITY- Nagakinahanglan ang Iloilo City sang masobra 130 ka nurses nga magatatap sa mga COVID-19 patients.
Sa interview sang Bombo Radyo kay Iloilo City Mayor Jerry Treñas, iya ginpahayag nga naghingyo na siya sa Department Of Health (DOH) nga magdeploy sang dugang nga nurses.
Suno kay Treñas, magluwas sa nurses halin sa DOH, may mga nurses man gikan sa mga ahensya sang gobyerno kaangay sang Bureau of Fire Protection, Philippine Coast Guard, kag Philippine National Police.
Ginpahayag sang alkalde nga tuman ka importante ang dugang nga nurses agud makadugang man sang mga health facilities para nga mag-akomodar sa mga pasyente sa tion nga magpadayon ang pagtimbuok sang kaso sang COVID-19.
Dugang pa sang opisyal, hingalitan niya ang 15 ka adlaw nga extension sang Modified Enhanced Community Quarantine Status sang syudad para sa amo nga katuyuan samtang limitado ang movement sang mga tawo.
Sa bahin sang vaccination, ginpahayag sang alkalde nga naubos na ang COVID-19 vaccine sa Iloilo City kag nakig-angot na siya kay Vaccine czar Secretary Carlito Galvez Jr. kag kay Testing czar Vince Dizon para sa dugang nga bakuna.
Suno sa natungdan, kutob subong nga adlaw na lang ang supply sang bakuna nga may yara ang Iloilo City.
