Nagdangat sa 1,282 ka indibidwal ukon 317 ka pamilya ang gindala sa mga evacuation center kasunod sang phreatomagmatic eruption sang Taal Volcano sa Batangas.
Suno sa National Disaster Risk Reduction and Management Council (NDRRMC), dako ang posibilidad nga magsaka sa 14,495 indibidwal ukon 3,523 ka pamilya ang i-evacuate bangud sa risgo sang nagapadayon nga aktibidad sa Bulkan Taal.
13 ka mga barangay sa Batangas ang naapektuhan sang paglupok sang nasambit nga bulkan.
Ini ang ginalakipan sang Poblacion kag Sinturisan sa San Nicolas, Gulod, Buso Buso, Bugaan West, kag Bugaan East sa Laurel, Subic Ilaya, Banyaga, kag Bilibinwang sa Agoncillo, Apacay sa Taal, Luyos kag Boot sa Tanauan City kag San Sebastian sa Balete.
Base sa data sang NDRRMC, malapit sa 1,400 ka mga indibidwal ang apektado sang paglupok sang bulkan.
Kaangot sini, nagmando si Philippine National Police (PNP) chief Police General Guillermo Eleazar sa ila mga lokal nga opisina agud magdeploy sang PNP vehicles kag personnel agud magbulig sa evacuation.
Una naman ginpasigurado ni Presidente Duterte ang mga pagkaon kag iban pa nga relief aid sang Department of Social Welfare and Development (DSWD) para sa mga apektado sang aktibidad sang Taal.
Matandaan nga Enero 2020 sang naglupok man ang nasambit nga bulkan nga nag-apekto sa komunidad sa Batangas — duha ka bulan antes gin-igo sang COVID-19 pandemic ang Pilipinas.
