Gin-athag ni Department of the Interior and Local Government (DILG) Undersecretary Epimaco Densing III nga wala sang kahilabtanan ang pag-ugtas ni Iloilo City Mayor Jerry Treñas sa nangin desisyon sang COVID-19 Inter-Agency Task Force for the Management of Emerging Infectious Diseases (IATF-EID) nga ipaidalom ang syudad sang Iloilo sa Enhanced Community Quarantine (ECQ) status.
Sa interview sang Bombo Radyo kay DILG Usec. Densing, iya ginpahayag nga nahangpan niya si Treñas kag ang pagkinahanglan nga mabalanse ang ekonomiya sang syudad rason nga mangin siya ang nagduso man nga ipabilin sa MECQ ang status sang Iloilo City apang may pila ka mga health expert nga nagrekomenda sa IATF nga ipaidalom sa ECQ ang syudad .
Ini kasunod sang nadetect nga bag-o nga variant sang COVID-19 sa Western Visayas nga alpha kag beta nga mas makalalaton.
Gin-ako man niya nga wala na siya sang kontrol sa nangin desisyon sang IATF.
Liwat man nga ginpaathag ni Densing nga “EFFECTIVE IMMEDIATELY” ang pagpaidalom sa Iloilo Province kag Iloilo City sa ECQ apang udto na kahapon, Hulyo 16, gin-anunsyo ang quarantine classification bangud pila pa ka mga myembro sang IATF ang nagpirma sang direktiba.
Sa pihak sini, nagpasalig man ang natungdan sang bulig nga ayuda nagikan sa Department of Social Welfare and Development (DSWD) para sa Iloilo City kag Iloilo Province.
Dako man suno sa iya ang posibilidad nga indi matapos ang duha ka semana nga pagpaidalom sa syudad sa ECQ sa tion nga magnubo na ang health care utilization rate.
