Ano man oras ang pag-retiro ni Pinoy ring icon Senator Manny Pacquiao sa iya karera sa boksing, pat-od nga wala na sang makapanas sang legasiya nga iya i-bilin sa patag sang sini nga hampang.
Apang subong nga adlaw, Agusto 22, sa ginasiling sang iban nga posible katapusan nga hampang sang People’s Champ, isa ang iya tuyo: bawion ang World Boxing Association (WBA) “super” welterweight crown nga ginkuha sa iya kag ginpasa sa Cuban boxer nga si Yordenis Ugas. Ginpasa sang WBA ang amo nga titulo kay Ugas apisar wala man lang ini nakapatupa sang bisan isa ka hapaw nga sumbag batok sa Pambansang Kamao sang Pilipinas.
Pamatud-an ni Ugas sa sulod sang boxing ring subong nga adlaw nga deserving siya sa amo nga 147-pound title.
Apang antes niya ina mahimo, atubangon niya ang PacMan sang Pilipinas: nagaisahanon nga eight-division world champion, may karera nga nagalawig na sang 26 ka tuig, nakaagi sa 71 ka professional matches, may 62 ka daug, kag nag-knockout sa 39 niya ka mga kasumpong.
Ano ang tyansa ni Ugas, 35 anyos nga anay Olympic Bronze Medalist, nga mapamatud-an sa atubang sang 42 anyos nga si Pacquiao nga nagakabagay sa iya ang korona nga iya subong gina-uyatan?
*EKSPERYENSYA
2019, napierde si Ugas sa hampang batok kay Shawn Porter. Si Porter ang isa anay sa mga sparring partner ni Pacquiao. Pagkatapos sang amo nga hampang, tatlo ka consecutive fights ang nadaug ni Ugas.
Sa interview sang Bombo Radyo sa boxing analyst nga si Edwin Espejo, iya ginpahayag nga kun basehan ang previous fights ni Ugas, masami ini nga naga-adapt sa estilo sang iya nga kasumpong.
Apang pahayag ni Espejo, wala sang impressive ukon dalagku nga pangalan nga nakontra si Ugas indi kaangay sa mga hall of famer kag future hall of famer nga nakasambuwa ni Pacquiao.
*FIGHTING STYLE
Orthodox ukon right-handed si Ugas. Lain ini sa Southpaw nga si Errol Spence Jr., ang orihinal nga kaaway nga amo gid kuntani ang nahandaan ni Pacquiao apang wala nadayon bangud sang eye injury ni Spence.
Kun basehan ang Porter vs. Ugas fight suno kay Espejo, nagaduko si Ugas sa iya away. “Kun amo na ang iya nga posisyon, dasig siya nga lab-uton ni Manny. While laba ang iya nga kamot, mas madasig maglupad ang kamot ni Manny.”
Ginpaathag ni Espejo nga kun magduko si Ugas, wala siya sang upper body strength agud nga mapalagyuhan ang sumbag ni Pacquiao.”Dapat he should fight tall in order to neutralize Manny’s speed.” Apang kun speed naman ang istoryahan, “pierdehon gid siya ni Manny sa speed lang.”
Suno kay Espejo, kalabanan sang nakasambuwa ni Pacquiao, lunsay mas mataas sa iya. Katapusan nga nakasambuwa ni Pacquiao nga mas manubo sa iya amo ang 5’4″ Mexican boxer nga si Emmanuel Lucero nga ginpierde man ni Pacquiao via 3rd Round Technical Knockout.
*SAOT NI PACQUIAO
Suno kay Espejo, indi kilala si Ugas nga ‘body-puncher from the distance’. Bangud sini, kinahanglan niya nga magdikit kay Pacquiao.
“Kapag dumikit naman siya kay Manny, ayawan naman siya sang speed ni Manny,” suno kay Espejo bangud sang bantog nga combinations ni Pacquiao.
“Ugas will have to neutralize Manny’s lateral movement,” pahayag ni Espejo nga nagapatuhoy naman sa infamous ‘saot ni Manny sa sulod sang ring’.
Tentative suno sa natungdan ang jab deliveries ni Ugas, ‘perfect target’ sa counter right hooks sang Pinoy ring icon.
*ANTI-CLIMACTIC FIGHT
Subong mahibaluan ang sabat kun deserving si Ugas nga sa iya ginpasa ang korona nga ginkakas sang WBA kay Pacquiao bangud sang inactivity sang People’s Champ sa boksing.
Subong man mahibaluan kun worth it bala si Ugas nga mangin last fight sang people’s champ.
“It’s not good for someone to take that belt without fighting me,” una nga pahayag ni Pacquiao sa iya grand arrival sa Las Vegas, Nevada.
100% naman nga sigurado si Ugas nga indi siya ma-knockout ni Pacquiao.
Mapierde ayhan liwat ni Pacquiao ang Father Time kag mapadayon ang pagtukod sang iya legasiya, ukon mahatagan tyansa si Ugas nga mangin madinalag-on batok sa isa sa best fighters sang kalibutan?
Bantayi ang update sa Bombo Radyo.
