Nagtanyag na sang bulig bisan ang pinaka-notorious nga gangsters sa Haiti kasunod sang tuman ka daku nga halit tuga sang 7.2 magnitude nga linog nga nagtay-og sa amo nga pungsod sang nagligad nga semana.
Suno kay Jimmy Cherizier alias ‘Barbecue’, lider sang gang nga G9 Revolutionary Forces, magabulig ang iya nga grupo kag ang ila kaalyado nga mga gangs para sa pagpadasig sang relief efforts.
Sandig sa data sang civil defence agency sang Haiti, nagsaka na subong sa 2,207 ang numero sang patay samtang 344 naman ang nagapabilin nga missing.
Nagsaka pa ang numero sang patay samtang ginapatigayon ang relief operations kag nabudlayan man ang otoridad sa security sa mga distribution points.
Ini bangud may mga gangs man nga nag-hijack sa aid trucks kag sa mga ambulansya rason nga helicopter na lang ang gingamit sa pag-transport sang bulig.
