Strikto nga ginabantayan sang mga kapulisan ang border control points nga nahamtang sa nagkalain-lain nga lugar sa syudad sang Iloilo.
Sa interview sang Bombo Radyo kay Patrolman Rhyner Gelilang, assigned sa Barangay Mohon, Villa Arevalo, Iloilo City, iya ginpahayag nga manageable naman ang trapiko subong bangud nakahibalo na ang mga pumuluyo sang ila dapat dal-on kag kun sin-o lang ang makasulod sa syudad.
Suno kay Gelilang, valid ID kag travel pass ukon certificate of employment ang ginapangita nila sa isa ka empleyado nga nagatrabaho sa syudad samtang business permit naman ukon DTI permit ang dapat ipakita sang mga negosyante.
Hugot man nga gina-check sang mga pulis ang unod sang container van agud mahibaluan kun bala essential gid man ang inug-deliver.
