Dako ang nangin parte ni Guimbal, Iloilo Mayor Oscar “Oca” Garin sa kabuhi ni Iloilo 4th District Board Member Domingo Oso Jr. ilabi na sa patag sang pulitika.
Sa interview sang Bombo Radyo kay Board Member Oso, iya ginpahayag nga bag-uhanon pa lang siya sadto sa pulitika, si Mayor Oca na ang nagbulig sa iya nga mangin Presidente sang Philippine Councilors League sang 2007.
Suno kay Oso, nakuha niya ang mayorya nga boto sa premier distrito bangud ginbuligan siya sang alkalde sa pagpangampanya.
Apang sa pagkamatuod pahayag ni Oso, bisan wala pa siya sadto sa pulitika kag nagatrabaho pa lang sa gobyerno, nagabulig na siya kay Garin.
Ang indi niya malipatan sa alkalde amo ang pagka-maprangka sini nga sahi sang tawo apang palasunlog kag eksperto gid magpakadlaw sa grupo.
