ILOILO CITY- Gin-ako ni Mayor Jennifer Garin Colada, anak ni anay Mayor Oscar ‘Oca’ Garin, nga isa ka makabig dako nga pagtilaw sa ila relasyon nga mag-amay ang ila indi pag-intindihanay sa sulod sang apat ka tuig sadto bangud namalibad siya nga magsulod sa pulitika sa pihak sang pagpamilit sang iya amay.
Sa interview sang Bombo Radyo kay Mayor Colada, sa sulod sang apat ka tuig nga wala sila nagsapakanay, wala gid ini nagbuya sang bisan isa ka tinaga nga malain batok sa iya amay.
Suno kay Colada, mangin sa iya kabataan, wala gid niya gintudluan ang mga ini nga kaugtan ang ila lolo sa pihak sang ila away nga mag-amay.
Pahayag sang alkalde, ang pinakamanami nga bahin sang ila inaway amo ang natabo nga rekonsilyasyon kun sa diin ang iya amay mismo ang nagpaubos kag nagkadto sa ila balay.
Bilang isa naman ka public servant, ginpahayag ni Colada nga isa sa mga gintudlo sang iya amay amo ang pag-establisar sang maayo nga relasyon sa mga pumuluyo sa barangay,sa mga ordinaryo nga tawo, sa mga kabataan kag sa mga pigado.
Isa man sa indi malimtan sang alkalde amo ang pagtaya sang armas sang iya amay sa iya.
Magluwas diri, kaangay nga masami man siya nga ginapabudlayan sang iya amay sang una.
Apang suno kay Colada, ini nga pagdisiplina sang iya amay ang nagtudlo sa iya agud mangin maayo nga tawo.
