Puno sang mga duag pula nga rosas kag heart shaped balloons ang halos tanan nga malls kag masako ang gift boutiques sa bilog nga Kuwait kada Valentine’s day.
Suno kay Bombo International Correspondent John Jefferson Chandler, direkta sa Kuwait, kada adlaw sang tagipusuon, ginadagsa sang couples ang mga park kag malls kag halos tanan nga bantog nga restaurant sa amo nga pungsod, naga-promote gid sang special offers sa mga couple nga may lunch ukon dinner date.
Apisar ginatawag sang Islamists sa Kuwait ang Valentine’s day bilang “non-Muslim celebration,” mainit sa gihapon nga ginaselebrar sa pungsod ang adlaw sang Valentine’s.
Pahayag ni Chandler, tuman man ka approachable ang mga kuwaitee bangud naga-greet gid sila sang ”Happy Valentine’s day” sa linggwahe nga ingles sa mga expat kag mga turista.
Ini nga okasyon ang ginakabig man sang mga kuwaitee bilang adlaw sang pagpabutyag sang paghigugma kag apresasyon sa ila mga pinalangga kalakip na sa pamilya kag mga abyan, pinaagi sa paghatag sang mga bulak, cards kag regalo.
