Ginpanindugan ni Iloilo Governor Arthur Defensor Jr., nga wala ini sang intensyon nga himuon campaign platform ang komemorasyon sang EDSA People Power Revolution.
Ini kasunod sang madamo nga huring-huring nga may lamud politika ang selebrasyon sini bangud sa pagpadulong sa Iloilo City ni Presidential candidate Vice President Leni Robredo sa Pebrero 25.
Sa interview sang Bombo Radyo kay Defensor, iya ginpahayag nga may separado nga camapign rally ni Robredo sa Iloilo Sports Complex kag indi ini nalakip sa scheduled activities sang kapitolyo.
Suno sa Gobernador, ginatinguhaan sang probinsya nga makaselebrar apisar nga posible indi makatambung ang pila ka mga politiko nga iya ginpadal-an sang imbitasyon bangud sa pag-abut ni VP Leni.
Dugang pa niya, ang pagsaulog sang komemorasyon sang people power ang pamaagi agud mapahanumdom kag maipahibalo sa mga tawo ilabi na sa mga kabataan ang legacy sang People Power.
Yari naman ang mga aktibidad nga patigayunon sang Probinsya base sa gin-isyu nga Executive Order No. 136 sang Gobernador:
Sa Pebrero 25, patigayunon ang Freedom Rally sa Iloilo Provincial Capitol Grounds umpisa 8:00 sa gab-i.
May Freedom Countdown man nga himuon tubtub sa mismo oras kun san-o nagbiya si Marcos sa Pilipinas sang 1986.
Ang Freedom Countdown ang pagasundan naman sang People Power Noise Barrage nga himuon las 9:25 sa gab-i.
Tanan nga ahensya sang gobyerno, establisyemento, sektor, kag households ang gina-engganyo nga magpartisipar sa amo nga noise barrage, kag tanan nga simbahan ang gina-hingyo man nga magbagting sang lingganay sa amo man nga oras.
Sa programa, imbitado ang mga alkalde sa probinsya.
Ang People Power Noise Barrage ang pagasundan sang People Power Caravan.
Halin subong nga adlaw tubtub sa Pebrero 25, dapat man nga naka-display ang Philippine flags sa government offices, establishments, sectors, kag households.
Gin-athag ni Defensor nga ini nga mga aktibidad ang ginbalay sandig sa Memorandum Circular No. 2022-012 sang Department of the Interior and Local Government (DILG).
Ang amo nga circular ang naga-encourage sa local governments nga magdumdom sang 1986 revolt sa ila tagsa ka mga lugar.
