ILOILO CITY- Ginakakugmatan nga dalayon na gid nga mapapas sang pwersa sang Russia ang depensa sang Ukraine.
Ini kasunod sang report nga nagapadulong subong sa Kyiv ang 40 ka milya ka laba nga military convoy sang Russia.
Nagalakip ini sang armored vehicles, tanks, towed artillery kag iban nga logistical vehicles.
Base sa satellite images, yara na ang convoy sa gwa sang kapital sang Ukraine.
Ini ang kasunod sang apela sang Ukraine sa international community nga buligan sila.
base sa United Nations, masobra sa 400 na ka sibilyan ang nagkalamatay bangud sa pagpang-atake sang Moscow.
Gin-akusahan naman ni Ukrainian President Volodymyr Zelenskyy ang Russia sa pagkumiter sang war crimes.
Ginabanta nga masobra na sa tunga sa milyon ka refugees gikan sa Ukraine ang nagbiya agud magpadulong sa mga kaiping nga pungsod.
