ILOILO CITY- Gin-ako sang isa ka human rights lawyer nga wala sang bug-at ang pagsuporta sang Pilipinas sa resolution sa UN General Assembly nga nagamando sa Russia nga i- withdraw ang tropa sini gikan sa Ukraine kadungan sang pagkondenar sa amo nga pag-atake kag panawagan para sa proteksyon sang mga sibilyan.
Sa interview sang Bombo Radyo kay Atty. Joebert Pahilga, iya ginpahayag nga mangin ang United Nations ang indi man maka-enforce sang katuyuan sini batok sa Russia.
Apang suno sa abogado, ang nasambit nga tikang sang Pilipinas ang simbolo sang pagpakig-isa sang pungsod sa pagkondena sang giyera nga ginlunsar sang Russia.
Dugang pa niya, nagapakita man ini nga ang Pilipinas isa ka sibilisado nga pungsod nga nagatuman sa rule of law.
Nagapati naman ang chairman sang House Committee on National Defense and Security nga nakasandig sa gihapon sa Ukraine ang paghimo sang masunod nga tikang agud nga mapauntat ang Russia sa pagpang-atake sini.
Sa interview sang Bombo Radyo kay Iloilo 5th District Rep. Raul ‘Boboy’ Tupas, iya ginpahayag nga sa sitwasyon subong, may pila ka mga butang nga mahimo ang Ukraine.
Suno kay Tupas, ini nagalakip sang pagpamati sa demands sang Russia nga indi pagdayunon sang Ukraine ang pagsulod sa North Atlantic Treaty Organization (NATO) kag mangin neutral lamang ini.
Nahibaluan nga isa man sa gina-demand sang Russia amo ang demilitarisation sang Ukraine kag ang pagkilala sang Western countries sa soberanya sang Russia sa Crimean peninsula.
Samtang, ginadayaw naman ni Tupas ang nangin tikang sang gobyerno sang Pilipinas nga mag-upod sa international community nga naga-reaffirm sang commitment sang pungsod para sa isa ka malinong nga negosasyon.
