Ginpaboran sang United Nations General Assembly ang resolusyon nga nagakondenar sa pagsalakay sang Russia sa Ukraine.
Ginmaduan man sang UN ang Russia nga gilayon bawi-on ang ila military forces sa nagkalain-lain nga syudad sa Ukraine.
Ang resolusyon ang ginsuportahan sang 141 sa 193 ka mga myembro sa tumalagsahon nga emergency General Assembly session nga ginpatawag sang UN Security Council.
Ini ang pinakauna nga ginpatigayon nga emergency meeting sang assembly humalin sang 1982, base sa U.N website.
Samtang, sa apisar sini, mas ginpabaskog pa sang Russia sa ila ikapito nga adlaw nga pagpang-salakay sa Ukraine pinaagi sa pag-atake sa iban pa nga mayor nga syudad sang amu nga pungsod.
Ginkumpirma naman sang Russia nga kontrolado na nila ang syudad sang Kherson, ang syudad sa north sang Crimean peninsula.
Ginakahangaw-an naman ang posible mataas nga numero sang mga nagkalamatay sa syudad sang Mariupol, isa sa malapit ng lugar sa border sang Russia.
Gin-igu man sang rocket attack ang police department kag parte sang isa ka unibersidad sa Kharkiv, ikaduha sa pinakdako nga syudad sa Ukraine.
Samtang, ginpahayag naman nga masobra na sa 2,000 ang mga napatay nga civilian humalin sang Pebrero 24, ang pagsugod sang Russian invasion.
Suno naman kay Ukrainian President Volodymyr Zelensky, kapin 6,000 na ka mga soldado sang Russia ang ila nga napatay.
Ini ang baliskad sa pahayag ni Russian Ministry of Defense spokesperson Maj. Gen. Igor Konashenkov, sa diin suno sa iya, narekord lang sang Russia ang 498 nga mga napatay nga Russian soldiers kag 1,597 ang mga napilasan
Dugang pa niya, 2,870 ka mga Ukrainian service members ang ila napatay kag 3,700 ang nagkalapilasan umpisa sang nagsugud ang invasion.
Suno naman sa isa ka senior US defense officer, masobra na sa 450 ang ginlunsyar nga missile strike sang Russia.
