Gindayaw sang mga tiglawas sang World Health Organization (WHO) Philippines Country Office ang Iloilo Provincial Government bangud sang maayo nga Covid-19 vaccination program sa probinsya sang Iloilo kag may ginhatag man nga dugang nga mga panugyan agud mas ma-improve pa gid ini.
Ang team ang ginpangunahan ni Dr. Achyut Shresta, medical officer sang WHO. Nagbisita sila kay Iloilo Governor Arthur Defensor, Jr. kag nakig-istorya man sa Iloilo Provincial Health Office.
Sa interview sang Bombo Radyo kay Shresta, iya ginpahayag nga apisar maayo ang presentasyon sang probinsya, dapat gid pirme dumdumon kag magtutok sa Priority Groups A2 kag A5 nga ginabug-usan sang mga persona nga nagaedad 60 anyos pasaka kag ginabug-usan man sang indigent population.
Dapat man suno sa doktor nga madali nga ma-access sang mga tawo ang bakuna — butang nga ginahandaan naman sang probinsya bangud ginpahayag ni Defensor nga dal-on ang Covid-19 vaccines pati sa mga transport terminals kag sa mga construction sites.
Suno pa kay Shresta, dapat man nga indi makuntento ang probinsya nga makaisa lang ka bes nga kadtuan ang malayo nga mga lugar.
Ang vaccination teams sang probinsya ang naga-umpisa naman subong sa pagpatigayon sang house-to-house vaccinations sa bulig sang Rural Health Unit (RHU) personnel.
Dugang pa nga panugyan sang WHO-Philippines, dapat gid nga gamiton ang tanan nga pamaagi nga ma-edukar ang publiko agud nga malikawan ang pagpang-alang alang sa bakuna. ##
