Gintawag ni Pope Francis nga giyera na ang ginahimo sang Russia sa Ukraine— baliskad sa ginpahayag ni Russian President Vladimir Putin nga isa lang ka “special military operation” ang ila nga ginapatigayon sa amo nga pungsod halin pa sang Pebrero 24.
Sa iya nga weekly address sa St. Peter’s Square, ginpahayag sang Santo Papa nga nagabaha na ang dugo kag luha sa Ukraine kag ang amo nga gyera ang nagatuga sang dugang nga kamatayon, pagkaguba, kag pag-antos sang mga tawo.
Ini na ang ika-11 nga adlaw humalin sang ginpatigayon sang Russia ang invasion sa Ukraine.
Apisar sini nga statement, gintalupangod man sang kadam-an nga wala pa gihapon ginsapubliko ni Pope Francis ang pagkondenar sa ginhimo sang Russia nga pagsulod sa teritoryo sang Ukraine.
Sa baylo sang pagkondenar, nag-apelar ini liwat para sa kalinong, pagtukod sang humanitarian corridors, kag pagbalik sang negosasyon.
Ang Holy See ang nagasulit-sulit sa pagpanawagan sa kalinong, cease-fire, kag pagbalik sang negosasyon kag nagtanyag man nga mangin mediator ukon magpatunga sa duha ka pungsod.
Apang wala sang public condemnation halin sa Santo Papa kag ginahulat man sang publiko ang statement sang Vatican sa pag-atake sang Russia sa pinakadaku nga nuclear plant sang Europa nga nahamtang sa Ukraine.
