ILOILO CITY- Nagsugtanay nalang ang iban nga operators kag drivers sang depampasahero nga jeep angot sa arkila sa tunga sa asud-asud nga oil price increase.
Sa interview sang Bombo Radyo kay Jayson Tandog, jeepney operator, iya ginpahayag nga ginkasugtan nalang nila sang iya driver nga 50-50 nalang ang ila partihanay sa baylo nga P500 pesos nga amo ang regular nga arkila kada adlaw.
Suno kay Tandog, nahangpan niya ang sitwasyon sang mga driver nga puraot ang kita sa isa ka adlaw bangud sa mataas nga presyo sang gatong kag gindugangan pa sang limitado nga capacity sang pasahero nga mahimo pasakyon.
Sa interview naman sang Bombo Radyo kay Mr. Raymundo Boyet Parcon,presidente sang Iloilo City Loop Alliance of Jeepney Owners and Drivers Association (ICLAJODA) kag chairman sang Western Visayas Transport Cooperative (WVTC), iya ginpahayag nga tinguhaan nila nga masugilanon ang mga operators agud mahatagan man sang konsiderasyon ang mga driver sa ila ginabayaran nga arkila.
