Nagapamintana na sa North Atlantic Treaty Organization (NATO) ang pagpang-atake nga ginhimo sang Russia sa isa ka daku nga military base sang Ukraine nga nahamtang malapit sa border sang Poland, isa ka pungsod nga myembro sang amo nga Western defense alliance.
Sandig sa statement sang local officials, ang missile attack nga ginpatigayon sang Russia sa Yavoriv International Center for Peacekeeping and Security ang nagpatay sa 35 ka mga tawo. Pilason naman ang 134 ka iban pa nga indibidwal.
Kun basehan naman ang statement sang defense ministry sang Russia, ginpahayag nga ginguba sang air strike ang dalagku nga weapons nga ginasuplay sang iban nga mga pungsod. Ginpahayag man sang Russia nga ila napatay ang 180 ka foreign soldiers.
Ang amo nga military base ang nahamtang may kalayuon nga 25 kilometros lang halin sa border sang Poland. Diri nga base ginpatigayon sang Ukraine ang ila nga drills kaupod ang mga pungsod sang Western defense alliance antes pa man natabo ang Russian invasion.
Una naman nga nagpaandam ang Russia nga ang convoy sang Western countries nga nagakarga sang mga armas kag shipments sa Ukraine amo ang posible ma-konsiderar nga lehitimo nga mga target.
Nag-react diri ang iban nga mga pungsod. Suno sa Britanya, ang amo nga insidente ang posible suguran sang isa ka “significant escalation” sang gamo batok sa Russia.
Suno naman sa Estados Unidos paagi kay White House national security adviser Jake Sullivan, kun atakehon ang bisan isa lang ka teritoryo sang NATO, magabato kag magabalos ang bilog nga alyansa sang NATO. ##
