Bisan ang mga lider sa Estados Unidos ang nagpabutyag man sang kahangawa kasunod sang wala hawid-hawid nga pahayag ni US President Joe Biden nga manugpatay kag indi na mahimo makatinir sa pagginahum si Russian President Vladimir Putin.
Lakip ini sa ginpanghambal ni Biden pagkatapos sang iya nga speech sa Poland kun sa diin ginbisita man sini ang iban nga Ukrainian refugees.
Suno kay Russia spokesperson Dmitry Peskov, makakilibot ang nangin pahayag ni Biden. Wala nakahangop si Biden suno sa iya nga indi lang limitado ang kalibutan sa Estados Unidos kag sa Europa.
Kasunod sini, talalupangdon man ang maabtik nga pagdepensa sang US.
Suno kay US Secretary of State Antony Blinken, ang buot silingon ni Biden, indi pwede nga maggahum si Putin sa kaiping nga mga pungsod sang Russia kag sa bilog nga rehiyon.
Nagdepensa ang Estados Unidos nga wala ginatumod ni Biden ang pagginahum ni Putin sa Russia, ukon ang pag-ilis sang rehimen.
Gintumod man sang pila ka mga tawo nga bisan sang tiempo sang Cold War, nakahibalo na ang Americans kag Soviets nga lain ang kahulugan sa pagkondenar sa isa ka lider ipaanggid kun ginapanawan na ang pagkakas sa iya sa posisyon ukon ang regime change.
Talalupangdon man nga pila sa kaalyado sang US ang nagreact.
Suno kay French President Emmanuel Macron, ginabutang ni Biden sa alang-alang ang ceasefire negotiations sa tunga sang Russia kag Ukraine bangud sang iya nga ginapanghambal.
