ILOILO CITY – Nagdangat sa masobra 150 ang pilason samtang 400 naman ang gin-aresto bangud sang kinagamo sa tunga sang Palestinians kag Israeli Police sa Al-Aqsa Mosque sa Jerusalem kadungan sang pag-obserbar sang major holidays sa lugar.
Sa ginpagwa nga statement sang pulis, kaagahon pa lamang sang may yara na sang mga tawo nga naga-martsa sa lugar nga may dala nga Palestinian flag samtang ang iban naman ang may dala nga green banner nga ginapahayag iya sang Hamas terror group.
Ang mga ini ang naghaboy sang bato kag fireworks kag ang iban ang nagahanda sang bato kag iban pa nga bagay.
Suno sa kapulisan, ginhulat nila nga matapos ang pangamuyo sa aga antes ginsulod ang Temple Mount agud nga pahalinon ang mga naga-riot apang ang iban sa ila ang naghaboy pa sang bato sa Western Wall.
Ang iban nga mga Palestinians ang nagbarikada sang ila kaugalingon sa sulod sang Al-Aqsa Mosque kag ginpanghaboy sang bato ang mga pulis.
Ang riot suno sa pulis ang ginhimo agud nga mapunggan ang pagpangamuyo sa mosque nga naghalit sa madamo nga mga Muslim.
Suno sa Palestinian Red Crescent emergency group, naglab-ot sa 158 ka mga tawo ang napilasan kag kadam-an diri ang ginbulong sa al-Makassed Hospital kag sa field hospital nga gintukod sang mga medics.
Suno naman sa Foreign Ministry sang Israel, wala nagsulod sa mosque ang mga kapulisan.
Apang base sa video nga nagalapta, ginsulod sang kapulisan ang mosque kag gin-detain ang ginabanta 400 ka mga Palestinians.
Ginbuksan naman ang mosque pagkatapos nga na-aresto ang mga violators.
May nagalapta naman nga video kun sa diin, may yara sang mga pulis nga nagabakol sa mga Palestinians nga wala sang rason.
Ang Hamas terror group ang nagpahayag naman nga mapanabat ang Israel sa ginhimo nga “brutal assaults.”
Suno kay Hamas spokesperson Fawzi Barhum, ang bilog nga Palestinian ang naga-isa sa kawsa sang grupo.
Una na nga ginpahayag sang Gaza terror group nga ang Jerusalem kag Al-Aqsa Mosque ang ginakabig nga “red line” para sa ila.
