ILOILO CITY- Unanimously approved sa Sangguniang Panlalawigan ang resolution nga ginduso ni Iloilo 4th District Board Member Rolando Distura nga nagapanawagan sa Office of Civil Defense(OCD) Region 6 nga magpatigayon sang Regional Disaster Risk Reduction summit.
Sa interview sang Bombo Radyo kay Board Member Distura nga amo man ang chairman sang Committee on Disaster Risk Reduction sa Sangguniang Panlalawigan, iya ginpahayag nga ang summit ang pagaupdan sang Department of the Interior and Local Government(DILG),Department of Public Works and Highways (DPWH) kag iban pa nga concerned agencies nga makabulig sa pag-draft sang plano halin sa regional level pakadto sa idalom.
Suno kay Distura,buot silingon sini nga maplastar nga isa lang ang plano sa pagresponde.
Pahayag sang opisyal nga katuyuan man sang summit nga makahimo sang konkreto nga plano kag may road map nga sundon sang concerned agencies kag Local Government Unit (LGU).
Dugang sang natungdan, mas maayo nga i-revisit kag i-revalidate sang mga ahensya ang tagsa ka disaster plan kag makadihon sang plano nga isa lang ang direksyon sang tanan.
Suno pa sa iya, dapat maghingyo man ang Sangguniang Panlalawigan pinaagi sa amo ang resolution para sa pag- redesign sang mga flood control, retrofitting procedures, kag drainage system.
Ginpahayag man niya nga base sa natabo sa bagyo Agaton, kinahanglan pa sang tawo ang dugang nga edukasyon kag ihibalo.
