Binulan man nga nalubong sa utang kag nagutman ang mga electricians nga gin-hire agud magtukod sang condominium unit sa Megaworld, Mandurriao, Iloilo City antes ginsapak sang kontraktor kag napasaligan nga hatagan na sang sweldo.
Kun madumduman, 31 ka mga electricians ang nagdangop sa Bombo Radyo Iloilo subong nga Abril bangud wala maswelduhan sang halos duha ka bulan sang ila nga kontraktor nga 13th CBC ukon Connectivity Builders Corporation.
Nagtalang-talang ang amo nga mga trabahador sang amo nga tion bangud gin-alegar nga no-show man pati ang ila project engineer nga si Engr. Gelo Quilantang.
Sang una nga meeting sa Department of Labor and Employment (DOLE), huyhuy man gihapon ang abaga sang mga trabahador bangud wala man nagpakita ang kontraktor kag wala sang pasalig kun san-o ihatag ang ila sweldo nga ginpabalhasan.
Ang lamang nakasustiner sa mga trabahador sa ila kinahanglanon sa syudad amo ang bulig sang mga tawo nga naluoy sa ila pati na ang bulig sang Jaro Archdiocesan Social Action Center (JASAC).
Sa interview sang Bombo Radyo kay Ronald Barcemo, isa sa mga trabahador, iya ginpahayag nga sa pagpatunga sang DOLE, nagsugtanay na gid man ang mga trabahador kag ang 13th CBC sa sweldo nga mabaton.
Sa Mayo 2, ihatag ang 50% sang sweldo kag sa Mayo 16 naman ang 50%. Sa bahin ni Barcemo, ginabanta P28,000 pa ang iya kuluhaon, apang samtang wala pa ang Mayo 2, wala man ini sang sarang nga maobra diri sa syudad gani nga mabalik na lang anay sa iya banwa sa Lambunao.
Ginpahayag pa sini nga ang iya iban nga kaupdanan ang nagikan pa sa iban nga probinsya kag naapektuhan pa sang naglaslas ang Bagyo Agaton gani nga tuman gid ka kinahanglanon ang kuwarta.
Nagalaum ang mga electricians nga matuod na ang pasalig sang 13th CBC kag mahatag na gid man ang ila nga sweldo. ##
