ILOILO CITY- Patay ang duha ka mga bata matapos nalumos sa Tigum River sa Maasin, Iloilo.
Ang mga biktima lunsay babaye kag nagaedad sang 7-anyos kag 6-anyos.
Natabo ang pagkalumos sa porsyon sang suba nga sakop sang Sitio Balud, Barangay Caigon sa amo nga banwa.
Sa interview sang Bombo Radyo kay PLt. Jayson Mausig, OIC sang Maasin Municipal Police Station, iya ginpahayag nga nakit-an pa sang mga himata nga nagapaligo ang mga biktima apang makaligad ang pila ka minutos, hinali lang nga nadula ang mga ini.
Suno kay Mausig, gilayon man nga ginpangita ang mga bata kag sang nakit-an, nagalutaw na ang mga ini kag wala na sang kabuhi.
Nagapati naman ang pamilya nga wala sang foul play sa likod sang kamatayon sang duha ka mga biktima.
