ILOILO CITY- Naglapaw na sa P1 billion ang balor sang halit nga ginbilin sang Bagyo Agaton sa sektor sang agrikultura sa Western Visayas.
Sa interview sang Bombo Radyo kay Mr. James Earl Ogatis, Public Information Officer sang Department of Agriculture(DA) Region 6, sa P1.4B nga total production loss, pinakaapektado diri ang masunod: humay nga nagabalor P316 million; mais nga nagabalor P76.2 million; high value crops nga nagabalor P56.6 million, poultry and livestock nga nagabalor P60.4 million; kag aquaculture nga nagabalor P893.5 million.
Ginpahayag ni Ogatis nga katumbas ini sang 655,025 metric tons sang nahalitan nga mga pananom.
Kabilugan nga 35,966 nga mga farmers kag fisherfolks naman ang apektado sa bilog nga rehiyon.
Sa bahin sang Iloilo Province, yara sa P424.1 million ang production loss kun sa diin pinakanahalitan ang humay nga naglab-ot sa P182.2 million pesos.
Ginpasiguro naman ni Ogatis nga magahatag sang nagakaigo nga bulig ang ahensya para sa sektor sang mangunguma kag manugpangisda agud makabangon ang mga ini gikan sa dako nga kapierdehan bangud sa kalamidad.
