ILOILO CITY- Tunga ang reaksyon sang mga pumuluyo sang Estados Unidos sa pinakaulihi nga tikang ni President Joe Biden may kaangtanan sa pagbulig sa Ukraine bangud sa nagakatabo nga Russian invasion.
Ini may kaangtanan sa paghingyo ni Biden sa US Congress nga aprubahan gilayon ang $33 billion ukon P1.3 trillion bilang suporta sa Ukraine.
Suno kay Bombo International Correspondent Rufino Pinoy Gonzales direkta sa USA, ang amo nga funding request nagalakip sang masobra sa $20 billion ukon P1 trillion pesos para sa weapons, ammunition kag iban nga military assistance; $8.5 billion ukon P445 million para sa direct economic assistance sa gobyerno ; kag $3 billion ukon P157 billion nga humanitarian kag food security aid.
Pahayag ni Gonzales, ginaduso man ni Biden nga makakuha sang dugang nga kwarta gikan sa Russian oligarchs bilang bayad para sa war effort.
Dugang ni Gonzales, ini nga plano ni Biden ang magaduso sa mga mamalidha nga hatagan sang dugang nga gahom kag ikasarang ang iya administrasyon kun sa diin mahimo makuha sang mga US officials ang assets sang mas madamo nga oligarchs kag ihatag ang kwarta sa Ukraine.
Pahayag ni Gonzales, samtang may iban nga nagadayaw sa kasakuon ni Biden sa pagbulig sa Ukraine, may iban nga nagapakamalaot bangud kaangay nga napabay-an na niya ang ginapangatubang nga problema sang mga pumuluyo sang iya pungsod.
