Nagdepensa si former Commission on Elections (COMELEC) Commissioner Rowena Guanzon sa iya pagtambong sa pagsinapol upod si Leyte 1st District Rep. Martin Romualdez nga pakaisa ni presumptive president Bongbong Marcos kag ang pagkamusta niya kay Sandro Marcos.
Suno kay Ganzon, bilang kabahin sang P3PWD partylist, kinahanglan sang grupo nga magtrabaho upod sa iban nga mga mamalidha.
Dugang pa niya, agud nga may yara sang may mapasar nga layi kag budget para sa mga PWDs, kinahanglan nga magtrabaho upod sa iban nga mamalidha kag indi mahimo nga kontra lang nga kontra.
Apang, indi buot silingon nga indi niya pagtumuron ang mahimo anomaliya sang masunod nga administrasyon.
Suno pa sa iya, suportahan niya ang mga maayo nga programa apang indi siya magduha-duha nga pakamalauton ang ano man nga kasal-anan ilabi pa nga wala siya sang utang nga kabaraslan sa ila.
Si Guanzon ang ginpyestahan sa social media matapos nga isa siya sa mga myembro sang Partylist Coalition Foundation nga nag-endorso kay Romualdez apang ginklaro niya nga dinapit gid lamang siya nga bisita sa amo nga pagtililipon.
Nagpakuha man ini sang litrato kay Romualdez nga iya nga gin-post sa iya Twitter.
Sa pinakaulihi nga tweet ni Ganzon, apisar nga nagtambong siya sa pagsinapol upod sa supporters ni Marcos, kinahanglan sa gihapon ni Marcos nga magbayad sang P203B nga tax kag ang indi pagbayad sang income tax kun sa diin, convicted ini sa mga korte.
Suno naman sa opisina ni Romualdez, si Guanzon ang nagikan sa P3PWD, ang grupo nga aktibo nga nagkampanya sa mga sorties ni vice president Leni Robredo.
Si Guanzon ang kilala bilang isa sa mga nagabatikos kay Marcos bangud sang utang sini sa gobyerno.
