ILOILO CITY – Nagpatigayon sang pagsinapol si president-elect Ferdinand Marcos Jr. upod ang pila ka mga myembro sang Kongreso para hambalan ang legislative agenda sang 19th Congress.
Ginpakigbahin ni Senator Migz Zubiri ang mga litrato sang get-together sa headquarters ni Marcos sa Mandaluyong City.
Ang meeting ang ginpatigayon kadungan sang naga-init nga Senate presidency race sa tunga nanday Zubiri kag Senator Cynthia Villar.
Suno naman sa kampo ni Marcos Jr., ang pagsinapol ang ginpatigayon upod ang Senate contingent kag incumbent House Majority Leader Martin Romualdez kun sa diin, kabahin sang ginhambalan amo ang legislative plans sa masunod nga anum ka tuig sang incoming administration.
Sang Lunes, ginpahayag ni Zubiri nga nag-request si Marcos nga magpungko upod si Romualderz agud nga suguran na ang plano sa legislative agenda sa masunod nga Kongreso.
Nakaupod ni Zubiri sanday Senators Nancy Binay, Ronald dela Rosa, JV Ejercito, Jinggoy Estrada, Lito Lapid, Loren Legarda, Ralph Recto, Bong Revilla kag Raffy Tulfo.
Nakaupod naman ni Romualdez si Iloilo 1st district Representative Janet Garin kag Representative Tonypet Albano sang Isabela.
Ang 18th Congress ang magatakop na sa Hunyo 3.
