ILOILO CITY – Nagdangat sa masobra sa P623 million ang nagasto ni President-elect Ferdinand “Bongbong” Marcos Jr. sa iya kampanya sa 2022 presidential elections base sa iya Statement of Contributions and Expenditures (SOCE).
Ang SOCE ni Marcos Jr. ang gin-file ni Atty. Drixel Dabatos.
Sa amo nga dokumento, nagdangat sa P623,230,176.68 ang nagasto ni Marcos Jr. nga wala naglapaw sa P674 million nga limit para sa mga nagapadalagan sa pagka-presidente.
Wala sang may gingasto si Marcos Jr. nagikan sa iya personal nga pondo kag resources.
Suno sa iya kampo, ang tanan nga gingasto sa sulod sang tatlo ka bulan nga kampanya ang nagikan sa cash kag in-kind contributions nga nabaton niya nga nagdangat sa P624.6 million.
Ang president-elect ang nakabaton sang cash contributions nagikan sa “other sources” nga naglab-ot sa P373.25 million kag in-kind contributions nga nagabalor sang P4.2 million.
Nakabaton man sang non-cash contributions si Marcos Jr. nagikan sa iya political party nga Partido Federal ng Pilipinas nga nagdangat sa P247.234 million.
Magluwas kay Marcos Jr., nagdangat sa P119 million ang gingasto ni Sen. Manny Pacquiao sa presidential race kun sa diin, ang katunga sini ang nagikan sa iya kaugalingon nga kwarta.
Sa SOCE sang senador, nagdangat sa P62.6 million ang nagikan sa iya kaugalingon nga bulsa kag nakabaton siya sang P56.4 million nga bulig nagikan sa iban nga sources kun sa diin, P7.75 million ang cash kag P48.7 million ang balor sang non-cash contributions.
Una na nga nag-file sang SOCE si Senator Ping Lacson, Vice President Leni Robredo kag Dr. Jose Montemayor Jr.
Si Manila Mayor Isko Moreno ang nagpahayag nga naka-file na sang iya SOCE apang subong pa niya nga adlaw isapubliko ang detalye sini.
Sa mga vice presidential candidates naman, si Doc Willie Ong pa gid lamang ang naka-file.
Sanday senatorial candidates Loren Legarda, Sherwin Gatchalian, Carl Balita, Herbert Bautista, Atty. Chel Diokno, former PNP Chief Guillerno Eleazar kag former Sen. Antonio Trillanes IV ang naka-file na man.
Subong na nga adlaw, Hunyo 8, ang deadline sa pagpasa sang SOCE para sa mga nagpadalagan sa May 9 national and local elections.
Ini ang requirement agud nga makapungko ang isa ka opisyal nga magdaog.
Ang mga kandidato nga mapaslawan nga mag-file sang ila nga SOCE ang magapangatubang sang kaso kag multa.
Ang mga indi naman maka-file sini sa ikaduha nga tion ang subject sa perpetual disqualification to hold public office.
