ILOILO CITY – Nagsabat na ang aktres nga si Carla Abellana may kaangtanan sa pagbulaganay nila sang iya bana nga si Tom Rodriguez.
Sa isa ka YouTube vlog nga gin-post ni Carla sa iya nga channel, nag-reply ini sa isa ka komento nga nagasiling nga dapat wala niya ginsapubliko ang nabatyagan niya kun indi niya luyag sang negativity.
Suno kay Carla, indi niya matago ang iya nabatyagan sa tanan nga tion.
Pahayag niya, wala siya gintrato sang maayo, wala ginrespeto, gintunto, ginbutigan, gingamit, ginpakahuy-an kag ginpagwa nga daw isa ka mango nga tawo.
Mabaton ina ni Carla apang suno sa iya, nag-antus man ang iya pamilya.
Ginpanindugan naman niya nga wala siya sang may ginhimo nga malain kay Tom kundi ginhatag ang pagpalangga, ginrespeto, ginkabalak-an, ginsaligan kag ginhatag ang proteksyon kag ang tanan-tanan sa iya.
Gindumili-an man siya nga magpahayag sang iya nabatyagan.
Pito ka tuig nga indi siya mahimo nga magpangakig, magsunggod, masakitan, masubu-an, madismaya bangud indi pwede.
Makatilaw siya sang malain kung ginatinguhaan niya nga ipaintindi kay Tom nga nasakitan na siya kag indi na husto ang ginabuhat sini sa iya.
Sulit-sulit niya nga ginapapahanumdom kay Tom nga indi siya kontra kag maayo ang intensyon sini sa iya.
Gintinguhaan man niya nga enganyuhon si Tom nga magpangayo na sang professional help.
Sa pihak sini suno kay Carla, ginbaton niya siya sa gihapon nga wala sang pagduda kag pagbag-o.
Ginpakasalan niya kag bug-os sa tagipusu-on kag determinado nga atipanon ang pag-upod kag paghigugma-anay nila nga duha kag panindugan ang mga ginsumpaan sa atubang sang Diyos.
Madamo na siya sang ginhatag kay Tom kag wala na sang bilin sa iya.
Ginpahayag man ni Carla nga indi siya malain nga tawo kaangay sang nahibaluan sang publiko.
Ang espekulasyon sang pagbulagay sang duha ang naggwa sang gin-unfollow ni Tom sa Instagram si Carla kag na-link ang pangalan ni Kelley Day nga ginpanginwala man sang isa.
Apisar nga gin-follow liwat ni Tom si Carla, makita naman sa mga pictures nga gina-post sang aktres nga wala niya ginasuksok ang ila wedding ring kag wala man siya nag-react sa “I love you” comment ni Tom.
Ang duha ang nagpakasal sang Oktubre sang nagligad nga tuig.
