ILOILO CITY – Gin abi-abi sang pila ka mga senador ang pag-designate kay Undersecretary Maria Rosario Vergeire bilang officer-in-charge sang Department of Health (DOH).
Suno kay Senator Juan Miguel Zubiri, nangin tampad kag wala sang pamulitika si Vergeire sang siya ang tagpamaba sang DOH.
Ihatag niya ang iya 100% nga suporta diri.
Samtang, si Senator Bong Go nga amo ang ginalauman nga magapungko sa gihapon bilang chairman sang Senate committee on health and demography, ang nag abi-abi man sa pagdesignar kay Vergeire.
Suno sa iya, nakita sang publiko ang dedikasyon ni Vergerie kag ang passion sa serbisyo ilabi na sang administrasyon ni anay presidente Rodrigo Duterte.
Nagpasalig man ini nga magapabilin ang maayo nga koordinasyon sang Senado sa amo nga departamento.
Gintawag naman ni Senator Grace Poe si Vergeire nga kalmado, madamo sang nahibaluan kag impartial.
Suno sa iya, si Vergeire ang nangin “straightforward” sa paghatag sang update sa publiko kag ang iya professionalism bilang spokesperson ang nag-ani sang respeto halin sa iya kaupod kag mangin sang publiko.
Dugang pa ni Poe, si Vergeire ang maayo man nga kandidato para mangin masunod nga DOH secretary.
Kaangay sang iban nga senador, nakita man ni Senator Sonny Angara ang professionalism ni Vergeire sa iya trabaho.
Dugang pa niya, crucial ang DOH sa kabuhi sang mga Pilipino.
Nagalaum naman ini nga wala sang issue sa paggasto sang pondo sa departamento ilabi na sa mga dalagko nga kontrata kag kurapsiyon.
Matandaan nga kahapon, gin-anunsiyo ni Press Secretary Trixie Cruz-Angeles ang pag-designate kay Vergeire bilang OIC sang DOH.
