ILOILO CITY- Nagsaka pa sa 2011 ang narecord nga kaso sang dengue hemorrhagic fever sa probinsya sang Antique base sa record humalin Enero 1 tubtob Hulyo 30, 2022.
Sa interview sang Bombo Radyo kay Irene Duldoco, Health Education and Promotion Officer II sang Antique Provincial Health Office(PHO), iya ginpahayag nga subong lang nga semana,112 ang nagdugang nga kaso.
Apang suno kay Duldoco, amat-amat man nga naganubo ang numero sang pasyente nga may dengue kada semana.
Naglab-ot naman sa walo ang napatay bangud sa amo nga balatian.
As of August 3 nga data, yara sa 24 naman ang admitted sa hospital.
Dugang ni Duldoco, ang 2011 ka kaso ang tuman naman ka taas kun ipaanggid sa 263 nga narecord sa pareho man nga period sang 2021.
Nahibaluan nga ginpaidalom na sa state of calamity ang Antique bangud sa nagatimbuok nga kaso sang dengue.
