Makasalig ang Pilipinas sa Estados Unidos kun pagahambalan ang pagbangon sang pungsod gikan sa mabudlay nga ekonomiya nga dala sang padayon nga pagluya sang balor sang peso batok sa dolyar.
Ini ang pasalig nga ginpahayag ni Ambassador MaryKay Carlson kadungan mismo sang pag-igu naman sa all-time low rekord sang peso batok sa currency sang Amerika.
Suno kay Carlson, magapadayon ang Estados Unidos sa pagtindog bilang committed partner sa Pilipinas sa tanan nga pagpanghangkat sa ekonomiya kaangay sang Covid-19 pandemic kag epekto sang Ukraine-Russia conflict.
“What we see is…an economic downturn or economic challenges that are a result of supply chain disruption that are in part due to pandemic, but also naked aggression by Russia into Ukraine, that also led to some critical shortages on foodstuff, energy problems,” pahayag sini.
Lakip suno sa iya sa bulig sang Amerika amo ang development assistance programs sang United States Agency for International Development sa pungsod — ang engagements sang tatlo ka mga myembro sang American Chamber of Commerce with the Philippines kag nagkalain-lain nga public-private partnerships.
