Ginhatag sang Morocco ang isa pa ka daku nga historic upset sa World Cup 2022 paagi sa paglutos sa favorite team nga Belgium, 2-0, sa Group F Match sa Al Thumama Stadium sa Qatar.
Ginapahayag nagamatuod na ang pahayag nga naga-tigulang na ang ”Golden Generation” sang Belgium, isa sa favorites subong nga World Cup kag ika-duha sa FIFA standings, bangud ang naglutos sa ila ang yara lamang sa ika-22 nga rank sa kalibutan.
Ang duha ka goals sang Morocco ang nagikan kay Romain Saiss sa ika-73 nga minuto kag Zakaria Aboukhlal sa second minute sang added time.
Kun wala kuntani nalutos sa Morocco, posible nga ang Belgium pa ang nagpangaduha nga team (sunod sa defending champion nga France) nga nakaabanse sa last 16.
Atubangon sang Belgium ang 2018 World Cup finalist nga Croatia sa final group game agud nga malikawan nga matabo ang ila pinaka-temprano nga World Cup elimination halin sang 1998.
Ini ang ginakabig third big upset subong nga World Cup matapos ang kalutusan sang powerhouse team nga Argentina sa Saudi Arabia, kag pagkalutos man sang four-time World champions nga Germany sa Japan.
Kun naghilibi ang Morocco fans sa stadium kasunod sang paglutos sang Atlas Lions sa Belgium, lain naman ang natabo sa Brussels sa Belgium.
Nag-deploy ang mga pulis sang water cannons kag nag-gamit sang tear gas agud ma-disperse ang mga tawo nga nag-riot matapos nasaksihan ang resulta sang hampang.
May mga fans nga nangbuka sang bintana, naghaboy sang fireworks, kag nagsunog sang mga salakyan sa dalan.
Suno sa statement sang pulis sa Brussels, bisan wala pa man natapos ang hampang sang duha ka pungsod, may yara sang madamo nga tawo nga nakasuksuk sang hoodies nga na-involve sa kumprontasyon sa mga pulis kag naghatag risgo sa public safety.
May pila man ka fans nga nagdala sang mga stick. May journalist man nga napilasan sa nawong bangud sa fireworks.
Yara sa 100 ka mga pulis ang gin-mobilize kag ginpaandaman ang publiko nga likawan anay ang mga dalanon sa sentro gid sang syudad.
Ginsirado man ang metro stations amo man ang dalanon agud nga malikawan nga maglapta pa ang violence nga ginhimo sang mga fans.
