Ginakibang na ang mga drivers sa syudad sang Iloilo nga basi kun mangin tayuyon na naman liwat ang pagsinaka sa presyo sang produktong-petrolyo sa imbukada pa lang sang 2023.
Subong nga semana, dos pesos tubtub tres pesos ang ginalauman nga pagsaka sa presyo sang gatong kun basehan ang early forecast.
Daw kaangay nga bawi lang ini sa sunod-sunod nga senintimos nga tapyas sa presyo sang nagliligad nga semana.
Sa interview sang Bombo Radyo kay Raymundo “Boyet” Parcon, chairman sang Western Visayas Transport Cooperative kag presidente sang Iloilo City Loop Alliance Jeepneys Operators and Driver’s Association, iya ginpahayag nga mamurdoy gid ang transport cooperatives kun magbalik naman sa halos P100 kada litro ang presyo sang gasolina ukon krudo.
Antes sini, nakahingyo ang Iloilo City transport groups nga pasakaan sa P15 ang minimum fare sa jeep sa syudad apang P1 lamang nga saka ang gin-aprubahan sang Department of Transportation.
Suno kay Parcon, posible nga iduso liwat ini nga petisyon kun magpadayon ang increase sa presyo sang oil products.
