Gin-report sang Ukrainian Air Force nga napunggan kag naguba sang Ukraine ang 45 ka drones nga ginpalupad sang Russia kadungan mismo sang pagsug-alaw sa Bag-ong Tuig.
Sa amo nga pagpang-atake, gin-target sang Moscow ang Kyiv (kapital nga syudad) kag ang iban pa nga syudad sa Ukraine paagi sa paggamit sang missiles kag drones nga human sa Iran.
Sa statement sang air force, ginpahayag nga natigayon nga naguba sang air defenses sang Ukraine ang 45 ka “Shahed” drones ukon ang Shahed-136 “kamikaze” unmanned aerial vehicle (UAV) ukon kilala nga Geran-2 sa Russian operator.
Sa 45 suno sa Ukraine, 13 ang na-shot down sa paghingapos sang Disyembre samtang 32 naman sa new year.
Wala gin-report sang Ukrainian authorities kun may drones man halin sa Russia nga nakalusot kag nakalab-ot sa ila nga targets sa Ukraine.
Ini na ang ika-11 nga bulan sa Russian invasion sa Ukraine.
Matapos nalutos ang pwersa sang Russia sa pila ka areas sa Ukraine, nag-umpisa naman si Russian President Vladimir Putin sa pag-target sang imprastraktura sa Ukraine nga rason sang pagkadula sang kuryente sa mismo winter season. ##
