ILOILO CITY- Gin-athag sang Police Regional Office 6 nga recommendatory lang ang ila papel sa posible pagpatuman sang signal jamming sa Dinagyang Festival 2023.
Ini may kaangtanan sa ginaduso man sang Philippine National Police nga magpatumansang walo ka oras nga signal jamming sa highlight sang Dinagyang Festival sa Enero 21 kag 22.
Sa interview sang Bombo Radyo kay PBGen Leo Francisco, director sang Police Regional Office 6, iya ginpahayag nga mahimo lang sila mag-request para sa signal jamming kag ang National Telecommunications Commission na ang may final decision kun aprubahan ini.
Nahibaluan nga ginduso sang kapulisan ang pagpatuman sang signal jamming umpisa las 6:00 sang aga tubtob las 2:00 sang hapon sa Enero 21 kag 22.
Katuyuan sini nga indi mahatagan sang kahigayunan ang mga tawo nga may plano nga magpangsabotahe sa tunga sang selebrasyon.
Gindugang naman ni Francisco nga isa man sa ila ginapreparahan amo ang pagpadulong sa Iloilo ni Presidente Ferdinand Marcos Jr. para magsaksi sa Dinagyang Festival.
