ILOILO CITY- 40 na ka mga motorista ang naisyuhan sang citation ticket sa pagsugod sang operasyon sang Public Safety and Transportation Management Office upod sa Philippine National Police batok sa mga violators sang Anti-Modified Muffler Ordinance sang Iloilo City.
Sa interview sang Bombo Radyo kay Mr. Jeck Conlu, pinuno sang Public Safety and Transportation Management Office, iya ginpahayag nga sa 40 ka motorista,15 diri ang gin-isyuhan sang citation ticket bangud sa paggamit sang illegal nga modified mufflers sa ila mga motor vehicles samtang ang iban nga gin-isyuhan sang citation ticket amo ang mga motorista nga wala sang helmet kag lisensya.
Ini bangud suno kay Conlu, magluwas sa pagpatuman sang Anti-Modified Muffler Ordinance, ginakampanya man nila ang road safety.
Nahibaluan nga isa ka team ang gintukod para magpatuman sang ordinansa.
Gamit sang mga ini ang sound meter agud matakos ang kagahuron sang tambutso sang salakyan kun sa diin makabig na nga violation kun maglapaw ini sa 115 decibels.
Sa idalom sang ordinansa, ginadumilian ang paggamit kag pagbaligya sang modified mufflers sa mga pampubliko ukon pribado nga motor vehicles sa syudad sang Iloilo.
Ang sin-o man nga maglapas ang multahan sang P1000 sa first offense, P3000 sa second offense kag P5000 kag confiscation sang muffler sa third offense.
Gin-athag naman ni Conlu nga indi sakop sang ila operasyon ang mga motorsiklo nga may makina nga 350 cc pataas bangud nga built-in na sa motorsiklo ang ila muffler nga nagakaigo sa dalagko nga makina.
