ILOILO CITY- Ginkumpirma sang Iloilo Provincial Veterinary Office nga 11 na ka mga banwa ang may kaso sang African Swine Fever.
Sa interview sang Bombo Radyo kay Dr. Darel Tabuada, Provincial Veterinarian, iya ginpahayag nga ang nagdugang sa listahan amo ang banwa sang Banate nga may duha ka barangay nga apektado kag Barotac Viejo nga may isa barangay nga apektado.
Suno kay Tabuada, sa Banate, apat ka hog raisers ang ginkuhaan sang sample kag sa Barotac Viejo, duha ka hog raisers ang ginkuhaan sang sample kag lunsay nagpositibo.
Pahayag ni Tabuada, antes ang pagkuha sang samples, may yara na sang narecord nga mga nagkalamatay nga baboy sa amo nga mga lugar.
Dugang niya,wala pa man nakagwa ang resulta, nakaamat-amat naman sila pang-depopulate sang mga baboy.
Antes ang nasambit nga mga banwa,una na nakarecord sang balatian ang Oton, San Miguel, Alimodian, Leganes, Sta. Barbara, New Lucena, Mina, Barotac Nuevo,kag Dumangas.
Kun tingbon, 65 ka mga barangay sa bilog nga probinsya ang apektado sang African Swine Fever.
