ILOILO CITY- Positibo ang Iloilo Festivals Foundation Inc., nga matupungan ukon malapawan pa sang Dinagyang Festival 2023 ang numero sang mga turista nga nagsaksi sa Dinagyang Festival 2020.
Ang Dinagyang Festival 2020 ang ulihi nga live nga pagpatigayon sang festival antes naglupok ang pandemya rason nga nangin virtual na lamang ang selebrasyon sang 2021 kag 2022.
Sa interview sang Bombo Radyo kay Miss Joyce Ann Clavesillas, Executive Director sang Iloilo Festivals Foundation Inc., iya ginpahayag nga base sa data sang Department of Tourism, yara sa kapin 100,000 ka turista ang nagsaksi sa Dinagyang 2020 kag nagalaum ini nga malapawan ini nga numero subong nga tuig.
Ginpabugal naman ni Clavesillas nga sa subong, halos fully booked na ang tanan nga hotels sa Iloilo City kag patimaan ini nga mangin jampacked ang Dinagyang Festival 2023.
Pila sa mga major events sa Dinagyang amo ang Opening Salvo sa Enero 13; Miss Iloilo 2023 sa Enero 18; Dinagyang Food Festival humalin sa Enero 19 tubtob 22; Sto. Niño fluvial procession kag Solemn foot procession sa Enero 20; Kasadyahan sa Kabanwahanan, Sponsors’ Mardi Gras, Grand Religious Sadsad, kag Dinagyang Ilomination kag Floats Parade of Lights sa Enero 21; and Feast Day of Señor Santo Niño De Cebu Concelebrated High Mass, Dinagyang sa Barangay Tribes Competition, kag Dinagyang Awarding Ceremony sa Enero 22.
Masaksihan naman sang mga Ilonggo ang libre nga konsyerto sang Philharmonic Orchestra nga ginakabig nagapanguna nga orchestra sa pungsod kag isa sa top musical ensembles sa Asia-Pacific region.
Sa interview sang Bombo Radyo kay Miss Joyce Ann Clavesillas, Executive Director sang Iloilo Festivals Foundation Inc., iya ginpahayag nga duha ka adlaw ang libre nga konsyerto.
Sa Enero 13,hiwaton sa Iloilo Convention Center ang amo nga concert kadungan sang Opening Salvo, samtang sa Enero 14, hiwaton ang konsyerto sa Plaza Libertad.
