Sala ang ginapatigayon nga shoring sa nagausmod nga Ungka flyover.
Ini ang obserbasyon ni Engr. Nilo Jardeleza, isa ka structural engineer, sa ginpatigayon nga ocular inspection kaupod ang Regional Project Monitoring Committee sang National Economic Development Authority Region 6.
Sa interview sang Bombo Radyo kay Engr. Jardeleza, iya ginpahayag nga sa baylo nga himuon ang shoring sa cantilever beam,dapat nga sa girder kag slab ini bangud ginaksbig ini nga superstructure agud nga sa tion nga manaug ang pier ,masalbar gihapon ang sa ibabaw nga porsyon.
Suno kay Jardeleza, na-miscalculate sang kontraktor ang pagpatigayon sang shoring bangud una bes, wala man makahibalo ang kontraktor sang dapat himuon.
Pahayag niya, gin-attempt sang kontraktor nga salbaron ang structure, apang indi man insakto ang pamaagi.
Naobserbahan man ni Jardeleza nga nagbag-o man ang elevation sang flyover kun ipaanggid sa iya nga orihinal nga desinyo.
Dugang niya, posible maglala ang paghulag sang imprastraktura pananglitan nga magdugay pa gid ang pag-abot kag pag-umpisa sang Technical Working Group nga ginpadala sang Department of Public Works and High Ways Central Office agud mag-verify kag mag-usisa sang duta nga ginatindugan sang proyekto.
