ILOILO CITY- Posible nga magsaka ang balayran para sa mga dokumento nga ginaproseso sa Iloilo City Civil Registry.
Sa interview sang Bombo Radyo kay Cherie Ampig, Asst. City Civil Registrar, iya ginpahayag nga tuman na ka outdated ang rate sang suktanay sa pagproseso sang birth,death ukon marriage certificates.
Suno kay Ampig, 14 anyos na nga ginapatuman ang amo nga rate kag tion na agud magpatuman sang adjustment.
Halimbawa suno sa iya, ang pagproseso sang delayed registration sang birth certificate ang dapat P263 na ang bayad apang tubtob subong, P50 lang ang sukot sang syudad.
Suno sa iya, kun lantawon, tuman ka dako sang diperensya, kag sa pagkamatuod, ang City Government amo ang naga-subsidize ukon nagatabon sa kulang nga amount.
Gin-athag man niya nga indi man ini madali-dali nga mapatuman bangud kinahanglan pa sini nga mag-agi sa husto kag legal nga proseso.
