ILOILO CITY- Kapin sa P1.3 million nga balor sang illegal drugs ang nakuha sang otoridad sa ginpatigayon nga buy bust operation sa isa ka apartment sa San Jose, Jaro, Iloilo City.
Ang amo nga operasyon ang nagresulta sa pagkadakop sa siyam ka mga indibidwal nga amo sanday Jameson Chua sang Buray Oton; Angelo Joy Lo sang Abilay Norte, Oton;Elea Alinsasaguin sang Naslo, Pototan; Kyster Gacer sang Calumpang, Molo; Martino Co sang South Fundidor, Molo;Kit Kenneth Quijano sang Barangay Fatima, Jaro; Raniel Ferraris sang Rizal, La Paz; Gilbert Guzman kag Arnel Alemania, lunsay residente sang Brgy. 15, San Miguel, Iloilo.
Narekober sa drug den ang 40 ka sachets sang suspected shabu nga ginabanta P1,360,000 ang standard price kag P22,000 nga buy bust money kag iban pa nga mga drug paraphernalia.
Sa interview sang Bombo Radyo kay Barangay Kagawad Arvin Zerrudo, iya ginpahayag nga ginkasubo sini nga nahigkuan ang ila pangalan bilang drug-free barangay.
Nagapati naman ini nga bag-o gid lamang ang amo nga drug den bangud kun madugay na,pat-ud nga na-monitor na nila ang amo nga iligal nga aktibidad sa lugar.
Ang amo nga apartment ang ginapahayag nga ginapanag-iyahan sang isa man ka anay opisyal sa barangay.
