Ginpuhag sang 7.6-magnitude nga linog ang mga residente sa Indonesia.
Suno sa US Geological Survey, yara ang epicenter sang linog sa 427 kilometers (265 miles) south sang Indonesian island nga Ambon kag may kadalumon nga 95 kilometers.
Nag-report man ang Meteorology, Climatology and Geophysics Agency sang Indonesia sang aftershocks sa magnitude nga 5.5.
Nagpaandam man ang Indonesian geophysics agency sang potential tsunami, apang sang ulihi gin-lift naman ang warning.
Wala pa sang reported nga nagkalahalitan sa amo nga linog.
Kaangay sa Pilipinas, masami nga naga-eksperyensya ang Indonesia sang sini nga seismic activity bangud sa posisyon sini sa Pacific “Ring of Fire” kun sa diin nagabungguanay ang tectonic plates.
Sang nagligad lang nga Nobyembre, may 5.6-magnitude quake man sa West Java province kun sa diin patay ang 602 ka tawo.
