Janiuay, Iloilo – Ginpa-Bombo sang pila ka mga concerned citizens ang sitwasyon sa nagkalaguba nga dike projects sa Janiuay, Iloilo.
Nahibaluan nga wala nadugayan ang proyekto, naguba na ini bangud human sa substandard nga materyales.
Sa interview sang Bombo Radyo kay Punong Barangay Nestor Colacion sang Brgy SM Villa, Janiuay Iloilo, iya gin-athag nga padayon ang proseso sa pagpakay-o sang dike paagi man sa Municipal Engineering Office.
Sa pagkamatuod, suno kay Colacion, isa ini sa mga nagpirma sang resolution agud mabutangan sang access road ang ila lugar agud maagyan sang mga dump truck nga karga ang materyales para sa rehabilitasyon sang dike.
Samtang, wala naman napat-od ang rason sang pagkaguba sang dike.
Nahibaluan nga ang kontraktor sang nasambit nga dike amo ang International Builder’s Corporation nga amo man ang kontraktor sang depektibo nga Ungka flyover.
Bukas naman ang Bombo Radyo sa sabat sang kontraktor sang proyekto.
