ILOILO CITY- Nagpabutyag sang pagkabalaka ang mga onion farmers sa banwa sang Miagao,Iloilo kasunod sang pag-apruba sang Department of Agriculture nga mag-import sang 21,000 metric tons sang bombay.
Sa interview sang Bombo Radyo kay April Joy Pineda Depamaylo, isa ka agricultural technologist sa Office of the Municipal Agriculturist sang Local Government Unit of Miagao, iya ginpahayag nga nagaumpisa pa lang subong sang planting season ang mga mangunguma sa ila banwa apang may problema na sila nga atubangon.
Suno kay Depamaylo nga nagaserbe man nga Municipal Coordinator for High Value Crops Development Program and Allium Commodity Focal Person, nabalaka sila nga kun magdungan ang harvest season sa importasyon sang bombay, pat-ud nga mabutong gid panubo ang farmgate price kag gamay gid lang ang kitaon sang mga mangunguma.
Sa pihak sini nga pagkabalaka, nagpasalig si Depamaylo sa tanan nga onion farmers nga buligan sila sa ila produksyon agud mapadamo ini sa harvest season agud mabawi nila ang naangkon nga kapierdehan sang nagligad nga tuig bangud sa madamo nga rason kaangay sang paglaslas sang bagyo nga nagguba sang ila mga pananom.
Nahibaluan nga ang Miagao ang ginakabig nga onion capital sang Western Visayas nga may 400 ka onion farmers sa 26 tanan ka mga barangay nga nagatanom sang bombay.
